[Soos gepubliseer in die Junie-uitgawe van jouwêreld e-tydskrif http://www.jouwereld.co.za/jl_blogs.html]

Almal het al van blogs gehoor, maar wie op aarde blog? Waar doen hulle dit, en waarom?

Wat op aarde is 'n blog?

Tensy jy êrens op 'n vergete plekkie in 'n afgeleë woestyn woon, moes jy al die konsep van blogging teëgekom het. Ons goeie vriende by Wikipedia meen dat 'n blog of webjoernaal (soos hulle verkies om dit te noem) 'n webwerf is wat gereeld - soms meer as een keer per dag – opgedateer word en waarop die inligting in chronologiese volgorde (volgens datum) weergegee word. Besoekers vind ook op die tuisblad die mees onlangse bydraes. Die outeur skep in wese 'n logboek van inligting wat hy met sy publiek, die besoekers aan sy webjoernaal, wil deel. Gewoonlik bestaan 'n webjoernaal uit teks, maar kan ook om foto's ('n fotowebjoernaal), video (vlog) of klank (podgooi of, op Engels podcast) gaan. Blogs bied hul lesers ook gewoonlik die geleentheid om reaksies op artikels te plaas.

Die gewildheid van blogs

Blogging word meestal deur individue, wat oor hul eie lewens en opinies skryf, gedoen. En siende dat elke mens die belangrikste persoon in hul eie lewe is, wonder mens hoe 'n blog dan gewild kan raak. Daar is drie maniere waarop blogs gewild word. Die eerste is deur verwysings (citations) op ander blogs of webwerwe of deur middel van affiliasie, byvoorbeeld webjoernaalrolle (blogrolls). Dit kan ook gelys word op verskillende webwerwe waarop gebruikers hul gunstelinge lys. In Suid-Afrika is Afrigator, Amatomu en Muti die toonaangewende webwerwe vir gunstelinge. 

So van blogging gepraat . . . waarom blog jy?

In die soektog na redes om te blog of nie te blog nie, het ek oor 'n reeks inskrywings, van ander se redes om aan hierdie kontaksport deel te neem, gestruikel.
"Ons almal blog vir 'n rede en dit is nie noodwendig 'n wen-blog nie maar iemand lees dit, jou gedagtes jou herinneringe en jou pyn, selfs jou lag." sê Tweeling wat haar sê by litnetblogs sê.

SpekBek sê in dieselfde inskrywing: "Ek blog want ek is 'n wannabe skrywer. Ek lei aan 'n narsistiese begeerte dat iemand tog net iets van my moet lees."

"Alleen in my lief vir Afrikaans my lief vir skryf vir die prosa en poësie die skeppende die sielsvoedende. Alleen in my dink en verstaan. En meer dikwels die gloed, seer! warm! rou! en etterend! in die verstaan!
Omdat ek seer het. Wat ek maar versigtig hier en daar ter woorde lê . . . wat ek wil vertel op papier vaspen aan die kruis van die skerm, wil hang en van ontslae raak. Wil verwoord en aan bande lê sonder om bloot net daarvan weg te hol.
Om myself te verbeel ek dra by tot iets groter, iets beter! Is deel van iets groter as myself..." is deel van fairybloom se beweegredes.

Die skrywer, Willem Anker, het in sy publikasie, Siegfried, nog 'n donkerder prentjie van die mens se behoefte om te blog geskets:
". . . Blogs - mense log aan en het hul eie ruimte waarin hulle hulleself kan maak en hermaak en vermaak aan al die selwe kan uitgee in die wêreld van die www. Maak jou eie rimpel in die riool van die net. Skree ek is ook hier. En so aan. Dan die statistiek: die meeste van die mense wat dit begin, hou hulle blogs by, brei hul lewens uit, probeer sê ek is ook 'n mens. Dan die stats: net 4% van al die siele wat hierop aanlog, lees iemand anders se woorde. Elkeen gaan terug na dit wat hy self gister geskryf het. Is ek nog hier? Wie was ek gister? Selfkennis in 'n tyd waar geheue downloadable en medikeerbaar is. Jy wil letsels los. Die wêreld is 'n toegegroeide wond. Al is dit ook nie vir ewig nie. Na 'n maand of wat waarin jou woorde alleen gelos word, verdwyn hulle eenvoudig van die www af. Maak plek vir die volgende Ek is . . . "

Lekker blogs om jou blogspiere te strek

* Onder die maan en sterre
* Gaan loer wie almal by litnetblogs blog
* Lees op duskant van nog 'n blogger se lewe en opinies
* Willeklong beweer die geskrifte is vars, trots en lekker Afrikaans
* Lees blogs in Afrikaans op blogcatalog
* Johan Swarts is 'n MA-student wat aan die Universiteit Stellenbosch studeer – sy tesis fokus op Afrikaanse blogs.

Hoe meet jy die sukses van jou blog?

As jy 'n blog het, is dit belangrik om te weet waar jou besoekers (traffic) vandaan kom, wat hulle lees en hoeveel tyd hulle op jou blog
spandeer. Daar is 'n verskeidenheid statistiek-sagteware op die mark beskikbaar. Probeer gerus enigeen van ons top 5:

* Google Analytics
* StatCounter
* SiteMeter
* AWStats
* MyBlogLog 

[Soos gepubliseer in die Junie-uitgawe van jouwêreld e-tydskrif http://www.jouwereld.co.za/jl_blogs.html]